Төрөөбүт тыл уонна сурук-бичик күнүнэн!
Тыл сайдыытын, ону тэҥэ симэлийиитин боппуруоһа билиҥҥи кэмҥэ сытыытык турар. Аныгы үйэ биир киэҥ сайдыытынан интернет ситимэ уонна ону кытта бииргэ киирбит араас технология буолар. Бу эмискэ уонна күүскэ биһиги олохпутугар киирбит технология сайдыыны тэҥэ араас өттүлэринэн таҥнары түһүүнү, намтааһыны аҕалла. Ордук кыра оҕолор атын омук тылынан бэриллэр араас видеолары элбэхтэ көрөллөрө-истэллэрэ, төрөөбүт тылынан саҥарар дьоҕурдарын намтатарын уонна атын омук тылынан саҥаран баралларыгар дьайарын туһунан билигин аһаҕастык этэллэр. Бу боппуруос – саха тылын сайдыыта, симэлийиитэ – бары таһымҥа элбэхтик ырытыллара, кэпсэтиллэрэ төрөөбүт тылбыт сайдар кэскилин түстэһэр.
Ол курдук биһиги үлэбит чэрчитинэн кэтээн көрөрбүтүнэн, бу кэнники сылларга оҕо төрөөбүт саха тылынан толору саҥарарыгар, санаатын сааһылаан этэригэр, саха норуотун уус-уран айымньытын умсугуйан ааҕарыгар үлэлэһэр төрөппүт, иитээччи, учуутал үксээтэ дии саныыбыт. Ону таһынан аныгы олох ирдэбилигэр сөп түбэһэр интернет ситимигэр араас саха тылынан тахсар порталлар, блогтар @centr_saidys@chemchuuk_saas@kyoregei_blog , YouTube-каналлар @chohoon.ykt , видеолар тахсаллара, «Айар» @ayar.ru национальнай кинигэ кыһата бэчээттиир интерактивнай кинигэлэрэ, Яндекс-переводчикка сахалыы тылбаас киириитэ, саҥа оҥоһулла сылдьар саха тылын үөрэтэр «Сахалыы» @rrred_lily диэн сыһыарыы о.д.а. төрөөбүт тылбыт сайдыытын, инники кэскилин бигэтэ.
Биһиги бэйэбит өттүбүтүттэн сотору кэминэн саха тылын үөрэтэр оҕолорго көмө буолар тренажердарбытын таһаарыахпыт. Бу 5 сыл тухары ыыппыт саха тылын олимпиадатыгар кыттыбыт оҕолор үлэлэрин ырытан көрөн баран, бастатан туран үөрэнээччилэр ордук ыарырҕаппыт тиэмэлэригэр тренажердары киллэриэхпит. Билигин буола турар араас олимпиадаларга өрөспүүбүлүкэ бары улуустарыттан кытталларын таһынан, саха тылын кытта билсэр «Знакомимся с якутским языком» диэн олимпиадабыт Арассыыйа араас уһуктарыттан кытталлара биһигини үөрдэр.
Биһигини кытта үлэлэһэр учууталларга, иитээччилэргэ улахан махталбытын тиэрдэбит. Төрөөбүт Ийэ тылбыт үйэлэр тухары үүнэ-сайда турдун!
Алена Корнилова, «Пора роста» дистанционнай тэрээһиннэр киинин салайааччыта
